హైదరాబాద్:
నిజాలను దాచిపెట్టి, వ్యక్తిగత పగ తీర్చుకోవడానికి న్యాయస్థానాన్ని వాడుకోవాలని చూసిన ఒక రిటైర్డ్ ప్రభుత్వ పాఠశాల ఉపాధ్యాయుడికి తెలంగాణ హైకోర్టు గట్టి పీఠం వేసింది. కోర్టు సమయాన్ని వృథా చేసినందుకు సదరు రిటైర్డ్ టీచర్కు ₹1 లక్ష రూపాయల భారీ జరిమానా (Costs) విధిస్తూ జస్టిస్ ఈ.వి. వేణుగోపాల్ గురువారం కీలక తీర్పునిచ్చారు. ఈ జరిమానా మొత్తాన్ని మలక్పేటలోని ప్రభుత్వ అంధుల బాలికల పాఠశాలలో జమ చేయాలని కోర్టు ఆదేశించింది.
అసలేం జరిగింది?
నిజామాబాద్ జిల్లాకు చెందిన పి. శ్రీనివాస్ అనే రిటైర్డ్ స్కూల్ అసిస్టెంట్.. గతంలో తనతో పాటు పనిచేసిన ప్రభురాజ్ అనే మరో ఉపాధ్యాయుడిపై చర్యలు తీసుకోవాలంటూ హైకోర్టులో ఒక రిట్ పిటిషన్ దాఖలు చేశారు. నిజామాబాద్ జిల్లా పాంగ్రిలోని మండల పరిషత్ అప్పర్ ప్రైమరీ స్కూల్లో విధులు నిర్వర్తిస్తున్న సమయంలో ప్రభురాజ్ సర్వీస్ నిబంధనలను ఉల్లంఘించారని, విధులను నిర్లక్ష్యం చేశారని శ్రీనివాస్ ఆరోపించారు. ఈ మేరకు 2016 నాటి ఘటనలపై ఆయన 2022 మరియు 2023లో ఉన్నతాధికారులకు ఫిర్యాదులు చేశారు.
కోర్టులో తేలిన నిజాలు
ఈ పిటిషన్పై విచారణ సందర్భంగా ప్రభుత్వ న్యాయవాది (Government Pleader) కోర్టుకు కీలక విషయాలు వెల్లడించారు. సదరు ఫిర్యాదులపై ఇప్పటికే శాఖాపరమైన విచారణ జరుగుతోందని కోర్టుకు తెలిపారు.
అయితే, కేసును నిశితంగా పరిశీలించిన జస్టిస్ వేణుగోపాల్.. పిటిషనర్ శ్రీనివాస్ ఉద్యోగ విరమణ చేసిన ఐదేళ్ల తర్వాత ఈ ఆరోపణలను తెరపైకి తెచ్చారని, ఇద్దరూ సర్వీసులో ఉన్నంత కాలం ఎలాంటి ఫిర్యాదులు చేయకుండా సైలెంట్గా ఉన్నారని అభ్యంతరం వ్యక్తం చేశారు. వీటికి తోడు, సదరు ఉపాధ్యాయుల ఇద్దరి మధ్య అంతకుముందే ఒకరిపై ఒకరు చేసుకున్న క్రాస్-కంప్లైంట్స్ (Cross-complaints) ఉన్నాయనే ప్రధాన వాస్తవాన్ని శ్రీనివాస్ కోర్టుకు తెలపకుండా దాచిపెట్టారని (Suppressing facts) న్యాయస్థానం గుర్తించింది.
పబ్లిక్ ఇంట్రెస్ట్ కాదు.. పర్సనల్ గ్రీవెన్స్!
ఇది ప్రజా ప్రయోజనాల కోసం వేసిన పిటిషన్ కాదని, పూర్తిగా వ్యక్తిగత కక్షలు, స్పర్థలతో కూడుకున్న వివాదమని హైకోర్టు తేల్చి చెప్పింది. న్యాయస్థానాలకు ఉండే అసాధారణమైన రిట్ పరిధిని (Writ Jurisdiction) వ్యక్తులు తమ సొంత గొడవలను సెటిల్ చేసుకోవడానికి వాడుకోలేరని స్పష్టం చేసింది. నిజాలను తొక్కిపెట్టి, కోర్టు యొక్క విలువైన సమయాన్ని వృథా చేసినందుకు శిక్షగా ₹1 లక్ష జరిమానా విధిస్తూ, శ్రీనివాస్ దాఖలు చేసిన రిట్ పిటిషన్ను న్యాయమూర్తి కొట్టివేశారు.
About the Author
