నీట్-యుజి ఫలితాల్లో తెలంగాణ విద్యార్థుల సంచలనం..

టాప్ 138 ర్యాంకుల్లో ఎనిమిది మంది మనోళ్లే! జాతీయ స్థాయిలో 13వ ర్యాంక్ సాధించిన సాహ్యు!

హైదరాబాద్:

నేషనల్ టెస్టింగ్ ఏజెన్సీ (NTA) గురువారం రాత్రి విడుదల చేసిన నీట్-యుజి (NEET-UG) 2026 ఫలితాలలో తెలంగాణ విద్యార్థులు అద్భుత ప్రతిభ కనబరిచారు. జాతీయ స్థాయిలో ప్రకటించిన టాప్ 138 ర్యాంకుల్లో తెలంగాణకు చెందిన ఎనిమిది మంది విద్యార్థులు చోటు సంపాదించుకుని రాష్ట్ర కీర్తిని చాటారు. వీరిలో వీరయ్యగారి సాహ్యు 99.99915 పర్సంటైల్‌తో ఆలిండియా 13వ ర్యాంకు సాధించి స్టేట్ టాపర్‌గా నిలిచాడు.

తెలంగాణ టాపర్లు వీరే..

రాష్ట్రం నుండి ఆలిండియా టాప్ ర్యాంకులు సాధించిన వారిలో:

వీరయ్యగారి సాహ్యు – 13వ ర్యాంక్ (స్టేట్ టాపర్)
బురా సాయి శరణ్ – 19వ ర్యాంక్
కందగట్ల హనీష్ – 21వ ర్యాంక్
అందెం సాయి చరణ్ రెడ్డి – 38వ ర్యాంక్
మయూక్ జయసింహ – 42వ ర్యాంక్
కొంపెల్ల సాయి గాయత్రి తేజోఅరుణిమ – 83వ ర్యాంక్
రుతుంబికా మొహంతి – 91వ ర్యాంక్
దేవేష్ శ్రీగోపాల్ అగర్వాల్ – 123వ ర్యాంక్ సాధించారు.

జాతీయ స్థాయిలో పంజాబ్‌కు చెందిన ఆర్యన్ గుప్తా 99.9999 పర్సంటైల్‌తో ఆలిండియా మొదటి ర్యాంక్ సాధించగా.. హర్యానాకు చెందిన పన్షుల్ బన్సాల్, రాజస్థాన్‌కు చెందిన ఉపలక్ష్య గోయల్ వరుసగా రెండు, మూడు ర్యాంకుల్లో నిలిచారు.

ఫలితాల విశ్లేషణ: డెబ్బై శాతం దాటిన క్వాలిఫైడ్స్

జూన్ 21న దేశవ్యాప్తంగా తిరిగి నిర్వహించిన (Re-conducted) ఈ ప్రవేశ పరీక్షకు దాదాపు 20 లక్షల మంది అభ్యర్థులు హాజరుకాగా.. అందులో 11.21 లక్షల మంది క్వాలిఫై అయ్యారు.

మొత్తం 138 మంది అభ్యర్థులు 720 మార్కులకు గాను 690 కంటే ఎక్కువ మార్కులు సాధించారు.
19 మంది అభ్యర్థులు 700 కంటే ఎక్కువ మార్కులు సాధించగా, 1,492 మంది 650కి పైగా మార్కులు సాధించారు.
600 పైబడిన మార్కులను 10,160 మంది, 500 పైబడిన మార్కులను 90,780 మంది విద్యార్థులు దక్కించుకున్నారు.

మహిళలదే పైచేయి!

ఈ ఏడాది ఫలితాల్లోనూ విద్యార్థినుల హవా స్పష్టంగా కనిపించింది. మొత్తం క్వాలిఫై అయిన వారిలో 58 శాతానికి పైగా మహిళలే ఉండటం విశేషం. పరీక్షకు హాజరైన మహిళల్లో క్వాలిఫై అయిన వారి శాతం 56.8 కాగా, పురుషులలో ఇది 55.1 శాతంగా నమోదైంది. టాపర్లలో 99 శాతం మంది 17 నుండి 19 ఏళ్ల వయస్సు గలవారేనని, 93 శాతం మంది తొలి ప్రయత్నంలోనే ఈ ఘనత సాధించారని ఎన్‌టీఏ తెలిపింది.

త్వరలోనే కౌన్సిలింగ్ ప్రారంభం

సమాంతర ప్రక్రియలు (Parallel Process) మరియు సాంకేతిక మార్పుల ద్వారా ఈసారి ఫలితాలను చాలా వేగంగా, సకాలంలో విడుదల చేసినట్లు ఎన్‌టీఏ వెల్లడించింది. ఎంబీబీఎస్ (MBBS), బీడీఎస్ (BDS) కోర్సుల్లో ఆలిండియా కోటా సీట్ల భర్తీకి మెడికల్ కౌన్సిలింగ్ కమిటీ (MCC) కౌన్సిలింగ్ నిర్వహించనుంది. అలాగే స్టేట్ కోటా సీట్లను ఆయా రాష్ట్ర ప్రభుత్వాలు భర్తీ చేస్తాయి.

ఫలితాలు, కౌన్సిలింగ్ వివరాల కోసం అభ్యర్థులు కేవలం అధికారిక వెబ్‌సైట్లయిన neet.nta.nic.in, mcc.nic.in లపైనే ఆధారపడాలని.. సీట్ల బ్లాకింగ్ లేదా మార్కులు పెంచుతామనే నకిలీ కాల్స్, మోసపూరిత వెబ్‌సైట్ల పట్ల అప్రమత్తంగా ఉండాలని అధికారులు హెచ్చరించారు.