ఒంగోలు, నవంబర్ 26: ప్రకాశం జిల్లా నూతన సూపరింటెండెంట్ ఆఫ్ పోలీస్ (ఎస్పీ)గా వి. హర్షవర్ధన్ రాజు ఆదివారం బాధ్యతలు స్వీకరించారు. ఇప్పటివరకు జిల్లా ఎస్పీగా పని చేసిన ఏఆర్ దామోదర్కు ఘనంగా వీడ్కోలు పలికిన అనంతరం ఆయన పదవీ బాధ్యతలు చేపట్టారు.
నూతన ఎస్పీకి జిల్లా పోలీసులు ఘన స్వాగతం పలికారు. ఏఎస్పీ (అడ్మిన్) కే నాగేశ్వర రావు, ఏఆర్ అదనపు ఎస్పీ కే శ్రీనివాస రావు సహా సబ్ డివిజనల్ డీఎస్పీలు, సీఐలు, ఆర్ఐలు, ఎస్ఐలు పుష్పగుచ్ఛాలు అందజేసి శుభాకాంక్షలు తెలిపారు.
ఈ సందర్భంగా ఎస్పీ హర్షవర్ధన్ రాజు మాట్లాడుతూ, ప్రముఖ స్వాతంత్ర్య సమరయోధుడు, ఆంధ్రప్రదేశ్ తొలి ముఖ్యమంత్రి టంగుటూరి ప్రకాశం పంతులు పేరు మీదుగా ఉన్న ఈ జిల్లాకు సేవ చేయడం తన అదృష్టంగా భావిస్తున్నానని అన్నారు. తన ప్రాధాన్యతలను వివరించారు. రాష్ట్ర ప్రభుత్వ ఆదేశాల మేరకు శాంతిభద్రతల పరిరక్షణకు అత్యంత ప్రాధాన్యత ఇస్తానని తెలిపారు.
మహిళల భద్రతకు ప్రత్యేక ప్రాధాన్యతనిస్తామని, శక్తి యాప్ ద్వారా వారికి అండగా నిలుస్తామన్నారు. సైబర్ నేరాల నియంత్రణకు కఠిన చర్యలు తీసుకుంటామని, నేర రహిత జిల్లాను ఏర్పాటు చేయడమే తన లక్ష్యమన్నారు. ప్రజల సమస్యలను పరిష్కరించడానికి తాను నిరంతరం అందుబాటులో ఉంటానని ఎస్పీ హామీ ఇచ్చారు. సంఘ విద్రోహ శక్తుల పట్ల, అసాంఘిక కార్యకలాపాల పట్ల జీరో టాలరెన్స్ విధానాన్ని అవలంబిస్తామని స్పష్టం చేశారు.
About the Author
